البنات حتعمل ف نفسها إيه اكتر من كده ؟!

الشباب بيصرخوا:
البنات هتعمل في نفسها إيه أكثر من كده؟َ
نانسي مرشدي
«ارحمنا يارب» .. البنات هتعمل في نفسها إيه أكثر من كده .. وغيرها الكثير من الجمل سمعتها أو قلتها مرة عندما مرت عليك بنت لابسة مش علي مزاجك، فاستيلات اللبس التي ترتديها الفتيات علي كل لون وشكل ومع كل موضة جديدة يثور الشباب علي هذا الجديد، ولكن البنات شايفها حرية شخصية إن الواحدة فيهم بتلبس علي الموضة وان الشباب اللي بيعكسوها أو رافضين ده ناس مش محترمة.

ففي كل يوم نلاقي موضة جديدة البنات طالعة فيها، مرة البنطلون الضيق والبادي القصير .. ومرة ثانية الايشارب «الاسنبش» ودلوقتي الجيبة القصيرة والبنطلون الاسترتش البرمودا تحتها.

الشيء العجيب الذي استفز عدد من الشباب والبنات إنك تلاقي البنات المحجبات بيقلدوا غيرهم وبيلبسوا البرمودا القصير والجيبة عليه، من غير ما تسأل نفسها هينفع ايه اللي هي عملاه ده ولا لا؟! .. من الطبيعي ان الموضوة تنتشر بين الشباب لكن مش من الطبيعي اننا نقلد وخلاص.

عمرو عبدالكريم قال: البنات بقي لبسها «أوفر» أوي وهما بصراحة «بيستهبلوا» أوي في اللي بيعملوه ده لذلك بتحصل مشاكل كثيرة بسبب اللبس وللأسف كل مرة يزيدون فيها من السيء للأسوأ ولا يوجد عندهم حدود بيلفت نظري أوي المحجبة اللي لابسة كده طب إيه اللي جاب الحجاب اللي أنت عملاه ده ما هو ده تقلعيه وتبقي براحتك يا تلبسيه وتبقي محررمة، تلاقيها رايحة تصلي وتقولك أصل في إسدال في الجامع .. يعني هو انت لازم تكوني محترمة ساعة الصلاة بس!!

أيدت عبير عصام نفس الكلام وقالت بصراحة أنا بحس ان احنا علي «البلاج» أو في النادي وليست كلية والمفروض تكون البنت محترمة فيها وللأسف انتشرت جدًا وأكيد هيطلع أسوأ منها.

لكن أحمد حسين قال كلام تاني: أنا عاجباني الموضة بس فيه ناس جهلة بتلبس اللبس ده وهو مش لايق عليها وبيقلدوا وخلاص وكمان تلاقي المحجبة لبساه وهو مينفعش مع الحجاب أصلا لأنها لازم تحترمه إنما هو كاستيل فهو جامد أوي.
وخلود سعيد قالت إن ممكن البنات بتعمل كده علشان تتعاكس من الشباب وفكرين إنهم أحسن ناس أو شكلهم حلو انما هما شكلهم سيء جدًا والحاجة الغريبة ان المحجبات بيلبسون اللبس ده طب ازاي يعني!!

واضافت آية فكري أنا مش بحبه لأنه ضيق أوي والبنات بتكون «تخينة» لذلك مش بيليق عليها بس الستات بتوع زمان كانا بيلبسو القصير الضيق ولكن مش للدرجة دي فممكن يكونا بيقلدوا الموضة بتاعة زمان.

وذكرت سمر إسماعيل أنها لا تحبه لأن شكله مش كويس وحتي البنت المحجبة اللي بتلبسه فهي مسلمة برده فالموضوع مش هيجزأ لأنها مش تحترم اللي هي لابساه لكن فيه ناس راضية عنه وناس لا .. بس أكيد هو مقبول والا مكنش انتشر كده وممكن تكون البنات بتلبس كده علشان تقلد الناس «اللي بره» علشان تكون متمدنة ومتحضرة ولكن العكس صحيح.

وحكي عبدالله محمود موقف مر به فقال: أنا مرة شفت بنت لابسة البنطلون الاسترتش البرمودا ولكن من غير الجيبة اللي فوقيه فاستغربت أوي يعني هي نسيت تكمل لبسها!! .. بصراحة كده مش عارف إيه أخرة «قلة الأدب» دي لكن ربنا يستر علينا كلنا.

أما مصطفي أحمد فقال: أنا مش عارف البنات هتعمل في نفسها إيه أكثر من كده بس أنا يلفت نظري البنت اللي تبقي لابسة كده وخاصة لما الموضوع انتشر وبدعيلهم ربنا يهديهم.